Ang Bahagi Mo sa Pagpapaganda ng Espirituwal na Paraiso

*** w15 7/15 p. 7 mga par. 1-2 Tumulong sa Pagpapaganda ng Espirituwal na Paraiso ***

SINABI ng Diyos na Jehova: “Ang langit ay aking trono, at ang lupa ay aking tuntungan.” (Isa. 66:1) Tungkol sa kaniyang “tuntungan,” sinabi rin niya: “Luluwalhatiin ko ang mismong dako ng aking mga paa.” (Isa. 60:13) Paano niya ito ginagawa? At ano ang kahulugan nito para sa atin na naninirahan sa “tuntungan” ng Diyos, ang lupa?

Paano niluluwalhati ng Diyos ang kaniyang “tuntungan”?

Sa Hebreong Kasulatan, ang terminong “tuntungan” ay ginagamit din para ilarawan ang sinaunang templo sa Israel. (1 Cro. 28:2; Awit 132:7) Napakaganda ng templong iyon para kay Jehova dahil nagsilbi itong sentro ng tunay na pagsamba sa lupa, at nagbigay ito ng kaluwalhatian sa tuntungan ng paa ni Jehova.

Sa ngayon, hindi na isang literal na templo ang sentro ng tunay na pagsamba. Pero may isang espirituwal na templo na lumuluwalhati kay Jehova nang higit kaysa sa anumang gusali. Ito ang kaayusan ng Diyos ng paglapit sa kaniya sa pagsamba sa pamamagitan ng pagkasaserdote at ng hain ni Jesu-Kristo. Nagsimula itong umiral noong 29 C.E. nang bautismuhan si Jesus at pahiran bilang Mataas na Saserdote ng dakilang espirituwal na templo ni Jehova.—Heb. 9:11, 12.

Ang “espirituwal na paraiso” at ang “espirituwal na templo” ay magkaiba. Ang espirituwal na templo ay kaayusan ng Diyos para sa tunay na pagsamba. Ang espirituwal na paraiso naman ang malinaw na nagpapakilala kung sino ang mga sinasang-ayunan ng Diyos at naglilingkod sa kaniya ngayon sa kaniyang espirituwal na templo.—Mal. 3:18. Inilalarawan ng espirituwal na paraiso ang ating natatanging kapaligiran, o kalagayan, kung saan sagana ang espirituwal na paglalaan at nagtatamasa tayo ng mapayapang kaugnayan sa Diyos at sa ating mga kapatid.

Nakatutuwang malaman na mula noong 1919, pinahintulutan ni Jehova ang di-sakdal na mga tao na tumulong sa paglilinang, pagpapatibay, at pagpapalawak sa espirituwal na paraiso sa lupa!

HIGIT NA PINAGAGANDA NI JEHOVA ANG KANIYANG ORGANISASYON

Inihula sa Isaias 60:17 ang kamangha-manghang pagbabago may kaugnayan sa makalupang bahagi ng organisasyon ni Jehova.

1.       Pagsulong sa kaayusan ng organisasyon

Sa nakalipas na mga taon, personal na naranasan ng maraming may-edad nang Saksi ang ilan sa mga pagbabago na lalong nagpaganda sa makalupang bahagi ng organisasyon ni Jehova. Naaalaala pa nila noong ang mga kongregasyon ay may isang lingkod ng kongregasyon sa halip na lupon ng matatanda, ang mga bansa ay may isang lingkod ng sangay sa halip na Komite ng Sangay, at ang mga tagubilin ay nagmumula sa presidente ng Watch Tower Society sa halip na sa Lupong Tagapamahala ng mga Saksi ni Jehova. Bagaman ang lahat ng brother na iyon ay may tapat na mga assistant, iisang tao pa rin ang gumagawa ng mga desisyon sa mga kongregasyon, sa tanggapang pansangay, at sa pandaigdig na punong-tanggapan. Noong dekada ’70, may ginawang mga pagbabago—ang pangangasiwa ay iniatang sa mga grupo ng matatanda sa halip na sa mga indibiduwal.

Ang mga pagbabagong ito ay batay sa mas malinaw na pagkaunawa sa Kasulatan. Sa halip na impluwensiya ng isang tao ang mangibabaw, ang organisasyon ay nakikinabang sa iba’t ibang magagandang katangian ng lahat ng “kaloob na mga tao” na inilalaan ni Jehova.—Efe. 4:8; Kaw. 24:6.

2.       Pagbabago sa paraan ng pagpapalagananap ng katotohanan

Isipin ang kamakailang mga pagbabago, gaya ng binagong disenyo, nilalaman, at paraan ng pamamahagi ng ating mga publikasyon. Hindi ba’t napakasarap mag-alok sa mga tao ng praktikal at magagandang literatura? Kapag ginagamit natin ang pinakabagong teknolohiya sa pagpapalaganap ng katotohanan, gaya ng website na jw.org, naipakikita natin na talagang gusto ni Jehova na ilaan ang patnubay na kailangang-kailangan ng mga tao kahit saan.

3.       Pagbabago sa espirituwal na pagpapakain sa kaniyang bayan.

Pinahahalagahan din natin ang pagbabagong ginawa para magkaroon tayo ng Pampamilyang Pagsamba o mas maraming panahon para sa personal na pag-aaral. At pinahahalagahan natin ang mga pagbabago sa mga programa ng ating asamblea at kombensiyon. Madalas nating sabihin na paganda ito nang paganda taon-taon! At tiyak na ipinagpapasalamat natin ang higit na pagsasanay na inilalaan ng ating mga teokratikong paaralan.

Maliwanag na si Jehova ang nasa likod ng lahat ng pagbabagong ito. Patuloy niyang pinagaganda ang kaniyang organisasyon at ang espirituwal na paraisong tinatamasa natin ngayon!

ANG BAHAGI MO SA PAGPAPAGANDA NG ESPIRITUWAL NA PARAISO

Isang karangalan na pahintulutan tayo ni Jehova na tumulong sa pagpapaganda ng ating espirituwal na paraiso. Ginagawa natin iyan sa pamamagitan ng masigasig na pangangaral ng mabuting balita ng Kaharian at paggawa ng alagad. Sa tuwing may natutulungan tayo na mag-alay bilang Kristiyano, napalalawak natin ang mga hangganan ng espirituwal na paraiso.—Isa. 26:15; 54:2.

Makatutulong din tayo sa pagpapaganda ng ating espirituwal na paraiso kung patuloy nating pasusulungin ang ating Kristiyanong personalidad. Sa ganitong paraan, mas marami ang maaakit sa espirituwal na paraiso. Kadalasan nang hindi sa kaalaman sa Bibliya kundi sa ating malinis na paggawi at mapayapang pakikitungo unang naaakit ang mga tao kung kaya pumapasok sila sa organisasyon at nagiging malapít sa Diyos at kay Kristo.